Jer 35 | NdeIBE | STEP | Leli yilizwi elafika kuJeremiya livela kuJehova ekubuseni kukaJehoyakhimi indodana kaJosiya inkosi yakoJuda, elathi,

Jeremiah 35

AmaRekhabi

1 Leli yilizwi elafika kuJeremiya livela kuJehova ekubuseni kukaJehoyakhimi indodana kaJosiya inkosi yakoJuda, elathi,

2 “Yana endlini yamaRekhabi uwabize ukuba eze kwelinye lamakamelo endlu kaJehova uwanike iwayini anathe.

3 Ngakho ngayathatha uJahazaniya indodana kaJeremiya, indodana kaHabhaziniya, labafowabo kanye lamadodana akhe wonke – umuzi wonke wamaRekhabi. 4 Ngabasa endlini kaJehova, ekamelweni lamadodana kaHanani indoda ka-Igidaliya umuntu kaNkulunkulu. Laliseduze lekamelo lezikhulu elalingaphezu kwelikaMahaseyiya indodana kaShalumi umlindi wesango. 5 Emva kwalokho ngabeka imiganu eyayigcwele iwayini lezinkezo phambi kwabantu bomndeni wama-Rekhabi, ngathi kubo, “Nathani iwayini.”

6 Kodwa bona baphendula bathi, “Iwayini kasilinathi ngoba ukhokho wethu uJonadabi indodana kaRekhabi wasinika umlayo lo othi: ‘Lina loba inzalo yenu akumelanga linathe iwayini. 7 Njalo lingakhi zindlu, lingahlanyeli kumbe lilime izivini; lingabi lokunye kwalezizinto, kodwa kumele lihlale emathenteni kokuphela. Ngalokho lizaphila isikhathi eside elizweni elizinzulane kulo.’ 8 Sakulalela konke ukhokho wethu uJonadabi indodana kaRekhabi asilaya khona. Thina labomkethu lamadodana ethu kanye lamadodakazi ethu asikaze silinathe iwayini, 9 kumbe sakhe izindlu zokuhlala kuzo loba sibe lezivini, amasimu kumbe amabele.

10 Sihlala emathenteni njalo siyakulalela konke ukhokho wethu uJonadabi asilaya khona.

11 Kodwa ekuhlaseleni kukaNebhukhadinezari inkosi yaseBhabhiloni ilizwe leli, sathi, ‘Wozani siye eJerusalema sibalekele amabutho amaKhaledi kanye lawama-Aramu.’ Sahlala kanjalo eJerusalema.”

12 Ilizwi likaJehova laselifika kuJeremiya lisithi: 13 “UJehova uSomandla, uNkulunkulu ka-Israyeli, uthi: ‘Kalifundi sifundo lilalele amazwi ami na?’ kutsho uJehova. 14 ‘UJonadabi indodana kaRekhabi walaya amadodana akhe ukuba anganathi iwayini, njalo umlayo lo wagcinwa. Kuze kube lamhla iwayini kabalinathi ngoba balalela umlayo kakhokho wabo. Kodwa mina sengakhuluma lani njalonjalo, kodwa kalingilalelanga. 15 Ngathuma izinceku zami abaphrofethi kini kanenginengi. Bathi, “Ngamunye wenu kumele liphenduke ezindleleni zenu ezimbi lilungise lezenzo zenu; lingalandeli abanye onkulunkulu ukuba libakhonze. Ngalokho lizahlala elizweni engalipha lona lina labokhokho benu.” Kodwa kalinakanga, njalo kalingilalelanga. 16 Inzalo kaJonadabi indodana kaRekhabi iwulandele umlayo eyawuphiwa ngukhokho wayo, kodwa abantu laba mina kabangilalelanga.’

17 “Ngakho uJehova, uNkulunkulu uSomandla, uNkulunkulu ka-Israyeli uthi; ‘Lalelani, ngizakwehlisela phezu kukaJuda laphezu komuntu wonke ohlala eJerusalema wonke umonakalo engabathembisa wona. Ngabatshela, kodwa kabalalelanga; ngababiza, kodwa kabasabelanga.’ ”

18 UJeremiya wasesithi kwabomndeni wamaRekhabi, “UJehova uSomandla, uNkulunkulu ka-Israyeli uthi, ‘Liwulalele umlayo kakhokho wenu uJonadabi layilandela yonke imfundiso yakhe njalo lenza konke alilaya khona.’

19 Ngakho uJehova uSomandla, uNkulunkulu ka-Israyeli, uthi: ‘UJonadabi indodana kaRekhabi kayikuswela umuntu wokungikhonza.’ ”